پاکستان کرکٹ بورڈ نے بالآخر بھارت میں جاری ورلڈ کپ کے دوران پاکستانی کھلاڑیوں کو نامناسب رویے کا سامنا کرنے پر اپنا احتجاج ریکارڈ کروا دیا ہے۔
پی سی بی نے سنیچر کے روز پاکستانی کھلاڑیوں کے ساتھ پیش آنے والے نامناسب رویے پر خاموشی توڑتے ہوئے ایک بیان جاری کیا ہے جس کے مطابق ’پی سی بی نے احمد آباد میں کھیلے گئے میچ کے دوران پاکستانی کھلاڑیوں کو غیر مناسب طریقے سے ہدف بنانے پر‘ باضابطہ طور پر شکایت درج کروائی ہے۔
ویزوں کے اجرا میں تاخیر کا معاملہ
منگل کی شام جاری کیے گئے اس بیان میں کہا گیا ہے کہ پاکستان کرکٹ بورڈ نے آئی سی سی سے پاکستانی شائقین اور صحافیوں کو ویزوں کے اجرا میں تاخیر اور ویزہ پالیسی کا اعلان نہ کرنے کا معاملہ ایک بار پھر اٹھایا ہے۔
بیان میں کہا گیا ہے کہ پاکستان کرکٹ بورڈ نے ایک بار پھر آئی سی سی کے سامنے ایک بار پھر باضابطہ شکایت درج کی ہے جس میں پاکستانی شائقین کو ورلڈ کپ میچز سے محروم کرنے سے متعلق آگاہ کیا گیا ہے۔
واضح رہے کہ سنیچر کو بھارت کے شہر احمد آباد میں پاکستان اور بھارت کے میچ کے دوران کپتان بابر اعظم اور وکٹ کیپر اور بیٹسمین محمد رضوان کو شائقین کی جانب سے نامناسب رویے کا سامنا کرنا پڑا تھا۔
نعرے اور اشتعال دلانے کی کوشش
بابر اعظم جب ٹاس کے لیے میدان میں اترے تو ان کے خلاف نامناسب نعرے لگائے گئے تھے جبکہ محمد رضوان کے آؤٹ ہونے پر بھی شائقین نے انہیں مذہبی حوالے سے اشتعال دلانے کی کوشش کی تھی۔
مزید پڑھیں
اس تمام صورتحال پر پاکستانی کھلاڑی مکمل طور پر خاموش تھے جبکہ پاکستان کرکٹ بورڈ کی جانب سے بھی حیرت انگیز طور پر مکمل خاموشی تھی۔
دوسری جانب بھارت نے کرکٹ ورلڈ کپ کے لیے پاکستانی شائقین اور صحافیوں کے لیے تاحال ویزہ پالیسی کا اعلان نہیں کیا۔
50 میں سے صرف 7 صحافیوں کو ویزے
بھارت نے انٹرنیشنل کرکٹ کونسل سے 50 ایکریڈیٹ صحافیوں میں سے صرف 7 صحافیوں کو تاحال ویزے جارے کیے ہیں جبکہ تماشائیوں کے لیے بھی تاحال ویزہ پالیسی کا اعلان نہیں کیا گیا۔
