متعدد مقدمات کا سامنا کرنے والے اڈیالہ جیل میں قید بانی چیئرمین پاکستان تحریک انصاف عمران خان نے عیدالفطر کے موقع پر جیل سے قوم کے نام خصوصی پیغام میں کہا ہے کہ دنیا بھر کے مسلمانوں خصوصاً اپنی پوری قوم کو ماہِ صیّام کی تکمیل اور عیدالفطر کی مبارکباد پیش کرتا ہوں۔
مزید پڑھیں
پی ٹی آئی کے مرکزی میڈیا ڈیپارٹمنٹ کے مطابق عمران خان نے اپنے پیغام میں کہا ہے کہ اقتدار پر ناجائز قابض گروہ پاکستان کو دستور و قانون اور اخلاق و اقدار ہی سے نہیں، بلکہ بنیادی اسلامی تعلیمات سے یکسر محروم کرتے ہوئے آمریت، لاقانونیت اور فرعونیت کو ملک پرمسلط کیے ہوئے ہے۔
سابق وزیراعظم نے کہا کہ ظلم سے خوفزدہ ہو کر ظالم سے سمجھوتہ کرنے کی بجائے ہمیں قادر و عادل رب کے وعدہ انصاف پر بھروسہ رکھتے ہوئے ظالم کے سامنے کلمہ حق کہہ کے جہاد کی افضل ترین قسم کو اپنانا ہوگا۔
عمران خان نے کہا کہ حقیقی آزادی کے حصول کی راہ میں جانوں کے نذرانے پیش کرنے والے معصوم شہریوں/کارکنوں کی قربانیوں کو خراجِ تحسین پیش کرتے ہیں۔ حقیقی آزادی قوم کا مقدر ہے، اسے جبر و فسطائیت اور سازش و شرانگیزی کے کسی خفیہ و اعلانیہ حربے سے زیادہ دیر تک ٹالا نہیں جاسکتا۔
عیدالفطر کے بابرکت موقع پر ربّ العزّت سے پاکستان کی سلامتی اور سالمیت کی دعا کرتے اور ریاستی و غیرریاستی عناصر پر مشتمل مجرموں کے کنسورشیم کیخلاف صبر، استقامت، نصرت اور کامیابی مانگتے ہیں۔
