گزشتہ روز لکی مروت میں بارودی سرنگ کے دھماکے میں شہید ہونے والے فوجی جوانوں کی نماز جنازہ ادا کردی گئی۔
مزید پڑھیں
پاک فوج کے شعبہ تعلقات عامہ آئی ایس پی آر کے مطابق، بارودی سرنگ کے دھماکے میں شہید ہونے والے جوانوں میں ضلع قصور سے تعلق رکھنے والے 26 سالہ کیپٹن محمد فراز الیاس، ضلع اسکردو کے 50 سالہ صوبیدار میجر محمد نذیر، ضلع گانچھے کے 34 سالہ لانس نائیک محمد انور، ضلع غذر کے 36 سالہ لانس نائیک حسین علی، ملتان کے 33 سالہ سپاہی اسد اللہ، ضلع گلگت کے 27 سالہ سپاہی منظور حسین اور ضلع راولپنڈی کے 31 سالہ سپاہی راشد محمود شامل تھے جن کی نماز جنازہ بنوں میں ادا کردی گئی۔
نماز جنازہ میں کور کمانڈر پشاور، حاضر سروس افسران، جوانوں اور عوام کی بڑی تعداد نے شرکت کی۔ شہدا کے جسد خاکی ان کے آبائی علاقے روانہ کر دیے گئے ہیں، جہاں انہیں مکمل فوجی اعزاز کے ساتھ سپرد خاک کیا جائے گا۔
آئی ایس پی آر کے مطابق، پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر شہدا کی یہ قربانیاں ہمارے عزم کو مزید تقویت دیتی ہیں۔
یاد رہے کہ خیبرپختونخوا کے علاقے لکی مروت میں گزشتہ روز بارودی سرنگ (آئی ای ڈی) کے دھماکے میں پاک فوج کے کیپٹن سمیت 7 اہلکار شہید ہوگئے تھے۔ واقعہ کے بعد علاقے میں موجود کسی بھی دہشتگرد کو ختم کرنے کے لیے کلیئرنس آپریشن کا آغاز کیا گیا تھا۔
