ماہرین غذائیت کے مطابق فائبر انسانی صحت کے لیے بے حد مفید اور ناگزیر ہے، جیسے پروٹین سے لبریز گوشت انسانی جسم کے لیے بنیادی جز ہے ویسے ہی جسم کی مجموعی صحت برقرار رکھنے کے لیے فائبر کی بھی ضرورت پڑتی ہے، فائبر کے استعمال کے نتیجے میں عمر میں 10 سال تک کے اضافے کے 80 فیصد تک امکانات بڑھ جاتے ہیں۔
فائبر دو قسم کا ہوتا ہے، فائبر کی ایک قسم کولیسٹرول کی سطح کم کرتی ہے جو کہ دلیہ، مٹر، بیج، پھلیوں، پھلوں، سیب، ترش پھل، اسپغول کے چھلکے اور گاجر وغیرہ میں پایا جاتا ہے جبکہ دوسری قسم جذب نہ ہونے والے فائبر کی ہے جو کہ گندم کے آٹے، گریوں، آلوؤں اور سبزیوں جیسے کہ گوبھی وغیرہ میں پایا جاتا ہے۔
ماہرین کے مطابق فائبر پودوں میں پایا جانے والا ایک ایسا جز ہے جو کہ مضر صحت مادوں کو جسم سے اخراج میں مدد فراہم کرتا ہے، یہ ہضم نہ ہونے والی غذا ہے، اس کے استعمال سے یہ صرف نظام ہاضمہ سے گزرتا ہے اور معدے سمیت آنتوں کی کارکردگی بہتر بنانے سمیت کولیسٹرول کو جذب کرتا ہے جس کے نتیجے میں انسان متعدد بیماریوں سے بچ جاتا ہے۔
فائبر پھلوں اور سبزیوں میں کثیر مقدار میں پایا جاتا ہے، اگر وزن میں کمی اور نظام ہاضمہ بہتر بنانا چاہتے ہیں تو سلاد کا ضرور استعمال کریں، عید کے دوران جب صرف گوشت اہم مرکزی غذا ہوتی ہے اس دوران غذائی ماہرین کی جانب سے کھانے کے دوران سلاد کا استعمال لازمی قرار دیا جاتا ہے۔
