حکومت آزاد جموں و کشمیر اور متعلقہ اداروں کی جانب سے عوامی جوائنٹ ایکشن کمیٹی کے بیشتر اہم مطالبات تسلیم کیے جانے اور ان پر تیزی سے عملدرآمد کے باوجود بعض حلقوں کی جانب سے غیر لچکدار رویہ اور ہٹ دھرمی کا سلسلہ تاحال برقرار ہے۔ سرکاری ذرائع اور حالیہ پیشرفت کے مطابق احتجاجی کمیٹی کے ساتھ طے پانے والے معاہدوں پر بڑی حد تک عمل کرتے ہوئے متعدد دیرینہ مسائل کو حل کر دیا گیا ہے۔
حکام کے مطابق معاہدے کے تحت کیے گئے اقدامات کے نتیجے میں احتجاج کے دوران درج ہونے والی زیادہ تر ایف آئی آرز واپس لے لی گئی ہیں، جبکہ قتل کے 15 سنگین مقدمات اس عمل سے مستثنیٰ رکھے گئے ہیں۔ اسی طرح کابینہ کے حجم میں کمی کرتے ہوئے وزرا کی تعداد 20 تک محدود کر دی گئی ہے۔
یہ بھی پڑھیں:ایکشن کمیٹی سے اب بھی مذاکرات کے لیے تیار، قانون توڑا گیا تو کارروائی ہوگی، وزیراعظم آزاد کشمیر
ذرائع کے مطابق احتجاج کے دوران معطل کیے گئے تمام سرکاری ملازمین کو بحال کر دیا گیا ہے جبکہ راولپنڈی اور اسلام آباد سے گرفتار مظاہرین کی رہائی بھی مکمل کر لی گئی ہے۔ جاں بحق افراد کے لواحقین کو معاوضوں کی ادائیگی کا عمل بھی مکمل کیا جا چکا ہے۔
حکومتی اقدامات میں مزید پیشرفت کے تحت پورے آزاد کشمیر میں سستے آٹے کی فراہمی کو یقینی بنایا جا رہا ہے جبکہ ہیلتھ کارڈ اسکیم پر مکمل عملدرآمد شروع ہو چکا ہے۔ لوکل گورنمنٹ ایکٹ کی منظوری کے بعد ترقیاتی فنڈز کی منتقلی کا عمل بھی شروع کر دیا گیا ہے۔ اس کے علاوہ منگلا ڈیم متاثرین کے واجبات کی ادائیگی مکمل کر دی گئی ہے جبکہ ددھیال کشمیر کالونی واٹر سپلائی اسکیم کو سالانہ ترقیاتی پروگرام میں شامل کیا گیا ہے۔
تعلیمی شعبے میں بھی متعدد اصلاحات کی گئی ہیں جن کے تحت اسکولوں اور کالجوں پر بجلی کے اضافی لوڈ میں کمی، مزید تعلیمی بورڈز کا قیام اور تعلیمی اداروں میں اوپن میرٹ کے نفاذ جیسے اقدامات شامل ہیں۔ اسی طرح پراپرٹی ٹرانسفر ٹیکس ایکٹ اسمبلی سے منظور ہو چکا ہے جبکہ اسپتالوں میں جدید طبی سہولیات کی فراہمی کے لیے اربوں روپے مالیت کے منصوبوں کی منظوری بھی دی گئی ہے۔
حکومتی ذرائع کا کہنا ہے کہ ان تمام اقدامات کے باوجود بعض عناصر کی جانب سے ایسے نئے مطالبات سامنے لائے جا رہے ہیں جنہیں غیر ضروری اور نظامی معاملات میں مداخلت کے مترادف قرار دیا جا رہا ہے۔ ان میں بعض شرائط کو ریاستی اور انتظامی معاملات پر اثر انداز ہونے کی کوشش بھی سمجھا جا رہا ہے۔
یہ بھی پڑھیں:پیپلز پارٹی آزاد کشمیر کی پارلیمانی پارٹی کا ہنگامی اجلاس طلب، موجودہ صورتحال پر مشاورت ہوگی
مزید کہا گیا ہے کہ الیکٹرک ڈیپارٹمنٹ اور دیگر اداروں کے انتظامی امور میں غیر ضروری مداخلت کی اجازت نہیں دی جائے گی تاکہ ریاستی رٹ برقرار رہے۔ حکومت کے مطابق میرپور ایئرپورٹ، ہائیڈل منصوبوں اور سڑکوں کی تعمیر سمیت دیگر ترقیاتی منصوبوں پر کام تیزی سے جاری ہے۔
واضح رہے کہ حکومتی مؤقف کے مطابق عوامی جوائنٹ ایکشن کمیٹی کے بیشتر بنیادی اور عوامی مطالبات پر عملدرآمد کیا جا چکا ہے، تاہم بعض حلقوں کی جانب سے مسلسل سخت رویہ اور نئے مطالبات صورتحال کو پیچیدہ بنا رہے ہیں۔
