وزیراعلیٰ مریم نواز نے کہا ہے کہ مولانا فضل الرحمان جیسے سینیئر سیاستدان سے دہشتگردی کی پشت پناہی کرنے والوں کی حمایت کی توقع نہیں تھی، نااہلی، نالائقی اور کرپشن سے خیبرپختونخوا کو نقصان پہنچانے والوں کو کٹہرے میں کھڑا کرنے کے بجائے ان کی حمایت میں بات کرنا افسوسناک ہے۔
مریم نواز نے اپنے سوشل میڈیا اکاؤنٹ ایکس پر اپنے بیان میں کہا ہے کہ جن لوگوں کی حمایت میں بیانات دیے جارہے ہیں، ان سے پوچھا جانا چاہیے کہ کیا وہ 13 سال کے دوران کسی ایک شہید کے جنازے میں بھی شریک ہوئے؟ ان پر الزام عائد کیا گیا کہ انہوں نے دہشت گردوں کو پناہ دی، انہیں وسائل اور پناہ گاہیں فراہم کیں اور پاکستان پر حملوں کے لیے صوبے کی زمین استعمال ہونے دی۔
یہ بھی پڑھیں: مریم نواز کو اقوام متحدہ کا ایوارڈ ملنے پر مبارکباد کی قرارداد پنجاب اسمبلی میں جمع
بیان کے مطابق ان لوگوں نے خیبرپختونخوا میں نااہلی کو فروغ دیا، عوام کی زندگیاں متاثر کیں اور صوبے کے قیمتی وسائل دھرنوں اور احتجاجوں پر خرچ کیے، جبکہ 13 قیمتی سال کرپشن اور نالائقی کی نذر کردیے۔
مولانا فضل الرحمان کو مخاطب کرتے ہوئے کہا گیا کہ جس سپہ سالار نے معرکہ حق میں ملک کو تاریخی فتح سے ہمکنار کیا اور جس کی قیادت میں پاکستان کو حرمین شریفین کے تحفظ کا اعزاز ملا، اس کے بارے میں مولانا کے الفاظ نے محب وطن پاکستانیوں کے دل دکھائے ہیں۔
مولانا فضل الرحمٰن جیسے سینئر سیاستدان، جو خود دہشت گردی کا شکار رہے ہیں، ان سے دہشت گردی کی پشت پناہی کرنے والوں کی حمایت کی توقع نہیں تھی۔ نااہلی، نالائقی اور کرپشن سے خیبر پختونخوا کی بربادی کے ذمہ داروں کو کٹہرے میں کھڑا کرنے کے بجائے ان کی حمایت میں بات کرنا نہایت افسوسناک ہے۔
جن کی حمایت میں بیانات جاری ہو رہے ہیں، ان سے پوچھا جائے کہ کیا تیرہ سال میں وہ کسی ایک شہید کے جنازے میں بھی شریک ہوئے؟ الٹا دہشت گردوں کو پناہ دی، انہیں پالا پوسا اور پاکستان پر حملہ آور ہونے کے لیے وسائل، پناہ گاہیں اور اپنے صوبے کی زمین فراہم کی۔
یہ وہی لوگ ہیں جنہوں نے خیبر پختونخوا میں نااہلی کے انبار لگا دیے، وہاں کے عوام کی زندگیاں تباہ و برباد کر دیں اور انہیں دہشت گردی کی نذر کر دیا۔ صوبے کے قیمتی وسائل دھرنوں اور احتجاجوں پرخرچ کر دیے، اور تیرہ قیمتی سال کرپشن اور نالائقی کی نذر کر دیے۔
جس سپہ سالار نے معرکۂ حق میں ملک کو تاریخی فتح سے ہمکنار کیا اور جس کی قیادت میں پاکستان کو حرمین شریفین کے تحفظ کا اعزاز ملا، اس کے بارے میں مولانا صاحب کے الفاظ نے ہر محبِ وطن پاکستانی کا دل دکھایا ہے۔
پاک فوج کے افسر اور جوان آج بھی دہشت گردی کا ناسور ختم کرنے کے لیے سینوں پر گولیاں کھا رہے ہیں۔ ہر روز کسی ماں کا لختِ جگر، کسی بہن کا بھائی اور کسی کا شوہر سبز ہلالی پرچم میں لپٹ کر گھر آتا ہے۔ان شہیدوں کے لہو کو سلام پیش کرنے اور اپنی فوج کے ساتھ کھڑے ہونے کے بجائے دہشت گردی کے خاتمے کی راہ میں رکاوٹ بننے والوں کا ساتھ دینا آپ کے شایانِ شان نہیں۔
آپ کی جماعت نے خود دہشت گردی کے زخم سہے ہیں، آپ کے ساتھیوں نے شہادتیں دی ہیں۔ اور جن کی حمایت میں آج آپ کھڑے ہیں، کل یہی آپ کے بارے میں انتہائی ناشائستہ زبان استعمال کرتے اور ذاتی حملے کرتے رہے ہیں۔ دہشت گردی کے متاثرین کا دہشت گردی کی پشت پناہی کرنے والوں کے ساتھ کھڑا ہونا کم از کم میری سمجھ سے باہر ہے۔
خیبر پختون خواہ میں میں اپنی حکومت کے خاتمے کا ذمہ دار اور کوئی نہیں تحریک انصاف خود ہے۔
— Maryam Nawaz Sharif (@MaryamNSharif) October 16, 2026
بیان میں مزید کہا گیا کہ پاک فوج کے افسر اور جوان آج بھی دہشتگردی کے خاتمے کے لیے اپنی جانیں قربان کر رہے ہیں اور ہر روز فوجی اہلکاروں کی میتیں قومی پرچم میں لپٹ کر گھروں کو پہنچتی ہیں۔ ایسے میں دہشت گردی کے خاتمے کی راہ میں رکاوٹ بننے والوں کا ساتھ دینا مولانا فضل الرحمٰن کے شایان شان نہیں۔
یہ بھی پڑھیں: اصولوں کی سیاست کرنے والے مولانا فضل الرحمان کے کچھ فیصلے چونکا دینے والے کیوں ہوتے ہیں؟
بیان میں کہا گیا کہ مولانا فضل الرحمان کی جماعت نے خود دہشتگردی کے زخم سہے ہیں اور ان کے ساتھیوں نے شہادتیں دی ہیں، جبکہ جن لوگوں کی حمایت میں وہ کھڑے ہیں، وہ ماضی میں ان کے خلاف ناشائستہ زبان استعمال کرتے اور ذاتی حملے کرتے رہے ہیں۔
مریم نواز نے امر پر بھی سوال اٹھایا گیا کہ دہشت گردی کے متاثرین کا دہشتگردی کی پشت پناہی کرنے والوں کے ساتھ کھڑا ہونا سمجھ سے بالاتر ہے۔
آخر میں انہوں نے کہا ہے کہ خیبرپختونخوا میں اپنی حکومت کے خاتمے کی ذمہ دار کوئی اور جماعت نہیں بلکہ تحریک انصاف خود ہے۔
