شعیب ملک سے علیحدگی کے بعد ثانیہ مرزا نے اپنے لیے نئے راستے کا انتخاب کرلیا ہے، پاکستانی شائقین کرکٹ کی سابقہ بھابی اب نظر آئیں گی نئے روپ میں، ٹینس اسٹار کے بعد میڈیا اسٹار رہنے والی مایہ ناز بھارتی ایتھلیٹ اب بنیں گی سیاستدان۔
مزید پڑھیں
بھارت کی سابق ٹینس اسٹار نے کھیل اور میڈیا میں اپنا سکہ جمانے کے بعد دوبارہ فیلڈ میں اترنے کا فیصلہ کر لیا ہے، لیکن اس بار وہ سیاست میں قدم رکھنے جا رہی ہیں، کانگریس پارٹی نے ثانیہ مرزا کو ٹکٹ جاری کرنے پر غور شروع کر دیا ہے۔
سابق بھارتی کرکٹ کپتان اور کانگریسی رہنما محمد اظہر الدین نے آئندہ انتخابات کے سلسلے میں ثانیہ مرزا کا نام بطور امیدوار تجویز کر دیا ہے، جس سے اس بات کو تقویت ملتی ہے کہ وہ ممکنہ طور پر بھارتی سیاست میں قدم رکھنے کے لیے تیار ہیں۔
ثانیہ مرزا آئندہ لوک سبھا کے انتخابات میں کانگریس کے ٹکٹ پر حیدرآباد سے امیدوار کے طور پر کھڑی ہو رہی ہیں، کانگریس پارٹی ثانیہ مرزا کو آل انڈیا مجلس اتحاد المسلمین کے سربراہ اسد الدین اویسی کے مد مقابل انتخابی دنگل میں اتارنے پر غور کر رہی ہے۔
رواں برس جنوری میں ثانیہ مرزا اور سابق پاکستانی کرکٹر شعیب ملک کے درمیان علیحدگی کی خبروں کی باقاعدہ تصدیق ہوئی تھی، دونوں میں علیحدگی کی خبریں طلاق سے ایک سال قبل شروع ہو چکی تھیں لیکن دونوں اسٹارز نے ایک ٹیلی ویژن شو میں شرکت کر کے سب کو حیران کر دیا تھا۔
