پاکستان کے اولمپک گولڈ میڈلسٹ ارشد ندیم نے رواں ماہ کے آخر میں شروع ہونے والے کامن ویلتھ گیمز میں ایک بار پھر تاریخ دہرانے کے عزم کا اظہار کیا ہے۔
ارشد ندیم نے 2022 میں برمنگھم میں منعقدہ کامن ویلتھ گیمز میں 90.18 میٹر کی ریکارڈ تھرو کے ساتھ جیولن تھرو کا طلائی تمغہ اپنے نام کیا تھا۔
29 سالہ ایتھلیٹ پیر کو سوئٹزرلینڈ روانہ ہوں گے جہاں وہ کامن ویلتھ گیمز سے قبل ایک بین الاقوامی مقابلے میں شرکت کریں گے۔
یہ بھی پڑھیں: فیفا صدر جیانی انفانٹینو سے ملاقات، ارشد ندیم عالمی اسپورٹس آئیکون بن گئے
کامن ویلتھ گیمز 23 جولائی سے 2 اگست تک اسکاٹ لینڈ کے شہر گلاسگو میں منعقد ہوں گے۔
اتوار کو لاہور کے پنجاب اسٹیڈیم میں اپنی آخری تربیتی نشست کے بعد میڈیا سے گفتگو کرتے ہوئے ارشد ندیم نے کہا کہ انہوں نے کامن ویلتھ گیمز کے لیے بھرپور تیاری کی ہے۔
’میں کامن ویلتھ گیمز جیسے بڑے ایونٹ سے پہلے سوئٹزرلینڈ میں ایک مقابلے میں حصہ لوں گا، میری ہمیشہ کوشش ہوتی ہے کہ کسی بھی بڑے مقابلے سے قبل ایک ایونٹ میں شرکت کروں تاکہ اپنی فارم، تیاری اور صلاحیت کا بہتر اندازہ ہو سکے۔‘
Pakistan's Olympic champion Arshad Nadeem is set to return to action on July 16 at the Spitzen Leichtathletik Luzern meet in Switzerland, a World Athletics Continental Tour Silver event. He will then travel to Glasgow to join Pakistan's contingent for the Commonwealth Games. pic.twitter.com/pcHa0dPIB5
— Faizan Lakhani (@faizanlakhani) July 9, 2026
میان چنوں سے تعلق رکھنے والے ارشد ندیم کا 2024 پیرس اولمپکس میں 92.97 میٹر کا تاریخی تھرو آج بھی اولمپک اور ایشیائی ریکارڈ کے طور پر برقرار ہے۔
2022 کے کامن ویلتھ گیمز کی یادیں تازہ کرتے ہوئے ارشد ندیم نے کہا کہ 4 سال پہلے میں نے کامن ویلتھ گیمز کا ریکارڈ قائم کیا تھا اور آج بھی وہ دفاعی چیمپیئن ہیں۔
’اس وجہ سے مجھ پر دباؤ بھی ہے کیونکہ گزشتہ 4 برس سے میں چیمپیئن ہوں اور اب مجھے اپنا اعزاز برقرار رکھنے کے لیے ایک بار پھر بہترین کارکردگی دکھانا ہوگی۔‘
مزید پڑھیں: کامن ویلتھ گیمز 2026: پاکستان کے 36 رکنی دستے کا اعلان، ارشد ندیم قیادت کریں گے
ارشد ندیم نے، جو 2024 اولمپکس کے لیے براہِ راست کوالیفائی کرنے والے پاکستان کے پہلے ایتھلیٹ بھی ہیں، کہا کہ گلاسگو میں مقابلہ انتہائی سخت ہوگا۔
انہوں نے بتایا کہ حال ہی میں سری لنکا کے جیولن تھرو ایتھلیٹ رومیش تھارانگا نے اوسٹراوا گولڈن اسپائک میٹ میں 86.57 میٹر کی شاندار تھرو کی ہے۔
’اس لیے میں سمجھتا ہوں کہ گلاسگو میں اس بار بھی سخت مقابلہ ہوگا، تاہم میں اس کے لیے مکمل طور پر تیار ہوں۔ میدان میں اترتے وقت ہمیشہ دباؤ ہوتا ہے، لیکن کامیابی کے لیے اسی دباؤ پر قابو پانا ضروری ہوتا ہے۔‘
