کینیڈا کے صوبے برٹش کولمبیا میں تیزی سے پھیلتی جنگلات کی آگ کے باعث ہنگامی حالت نافذ کردی گئی، جبکہ 20 ہزار سے زائد افراد کو گھر بار چھوڑ کر محفوظ مقامات پر منتقل ہونا پڑا۔ حکام کے مطابق آگ نے راتوں رات تقریباً دوگنا رقبہ اپنی لپیٹ میں لے لیا اور کئی مکانات و املاک کو نقصان پہنچا ہے۔
خبر رساں ادارے رائٹرز کے مطابق بالڈ رینج کے جنگلات میں لگی آگ تقریباً 9 ہزار 500 ہیکٹر رقبے تک پھیل چکی ہے اور تاحال قابو سے باہر ہے۔ سمر لینڈ، پیچ لینڈ اور اوکاناگن جھیل کے مغرب میں واقع دیگر علاقوں سے بڑے پیمانے پر انخلا کرایا گیا ہے۔
#BREAKING British Columbia declared a state of emergency and ordered mass evacuations as fast-moving, out-of-control wildfires rage across the region, destroying homes and straining emergency response efforts. pic.twitter.com/GAgsimtnde
— OBSERVER ♐ (@mfs379) August 9, 2026
صوبائی وزیر اعلیٰ ڈیوڈ ایبی نے صورتحال کو انتہائی خطرناک قرار دیتے ہوئے بتایا کہ ایک فائر افسر نے آگ کی شدت کو ایسے قرار دیا جیسے ’بم پھٹ گیا ہو‘۔ ان کے مطابق شعلے 100 فٹ بلند درختوں کو اپنی لپیٹ میں لے کر مزید 200 فٹ تک بلند ہورہے تھے اور آگ نے اپنا موسمی نظام پیدا کرلیا تھا، جس سے بجلی کڑکنے اور مزید آگ بھڑکنے کا سلسلہ جاری رہا۔
حکام کے مطابق کئی گھر تباہ ہوچکے ہیں جبکہ بعض افراد کو اچانک بدلتی صورتحال کے باعث پھنسنے پر ریسکیو کیا گیا۔ آگ کے باعث سمر لینڈ میں بجلی کی فراہمی بھی متاثر ہوئی اور پانی کی صفائی کا نظام متاثر ہونے کے بعد شہریوں کو پانی ابال کر استعمال کرنے کی ہدایت کی گئی۔
یہ بھی پڑھیں:فرانس اور اسپین میں جنگلاتی آگ مزید پھیل گئی، ساڑھے 3 لاکھ افراد متاثر
برٹش کولمبیا میں تقریباً 1500 فائر فائٹرز 100 سے زائد جنگلاتی آگ پر قابو پانے میں مصروف ہیں۔ صوبے میں 40 انخلا کے احکامات اور 49 وارننگز جاری کی جاچکی ہیں۔ رائٹرز کے مطابق رواں سال کینیڈا میں تقریباً 40 لاکھ ہیکٹر رقبہ جنگلات کی آگ سے متاثر ہوچکا ہے۔
