عدالتِ عالیہ نے آڈیو ٹیپس کی قانونی حیثیت پر جواب طلب کر لیا، تحریری حکمنامہ جاری

اسلام آباد ہائیکورٹ نے سابق چیف جسٹس ثاقب نثار کے بیٹے نجم الثاقب کی آڈیو لیکس درخواست پر سماعت کا تحریری حکم جاری کر دیا ہے۔

تحریری حکمنامے میں اسلام آباد ہائیکورٹ نے آڈیو ٹیپس کی قانونی حیثیت سے متعلق جواب طلب کر لیا ہے۔ عدالت نے وفاقی حکومت کو 4 ستمبر تک جواب جمع کروانے کا حکم جاری کر دیا ہے۔

اسلام آباد ہائیکورٹ نے تحریری حکمنامے میں وزیراعظم کے سیکریٹری، وزارت داخلہ اور وزارت دفاع کے سیکرٹریز کو بیان حلفی جمع کروانے کا حکم دیا ہے۔ عدالت نے کہا کہ جو تفصیلی رپورٹ سیکرٹریز نے جمع کروانی ہے ان کی درستگی کے بیان حلفی بھی جمع کروائیں۔

کہا گیا ہے کہ عدالت میں جواب 31 مئی کے آرڈر میں اٹھائے گئے سوالات کو مد نظر رکھ کر جمع کروائیں، عدالت کو بتایا گیا اٹارنی جنرل موجود نہیں، کچھ وقت دیا جائے، وفاقی حکومت کا پہلے سے جمع کرایا جواب 31 مئی کے آرڈر کے مطابق نہیں ہے۔ 18 اگست کو وزیراعظم کے سیکریٹری اور دفاع و داخلہ کے سیکرٹریز ذاتی حیثیت میں پیش ہوں۔

یاد رہے کہ نجم الثاقب نے پارلیمانی کمیٹی میں طلبی کو عدالت میں چیلنج کر رکھا ہے، عدالت نے نجم الثاقب کو پارلیمانی کمیٹی میں سمن کو معطل کر رکھا ہے۔