پاکستان تحریک انصاف (پی ٹی آئی) اور حکومت کے درمیان مذاکرات کے لیے رواں ہفتے بریک تھرو ہونے کا امکان ہے۔
ذرائع کے مطابق وزیراعلیٰ خیبرپختونخوا علی امین گنڈاپور کو مذاکرات کے لیے حکومتی کمیٹی تشکیل دینے کی یقین دہانی کروائی گئی ہے جس کے بعد سول نافرمانی کی تحریک کو مزید 10 روز کے لیے موخر کردیا گیا۔
یہ بھی پڑھیں پارٹی قیادت کو ٹکراؤ کے بجائے سیاسی مذاکرات کرنے کی تجویز دی ہے، شاہ محمود قریشی
ذرائع نے بتایا کہ رواں ہفتے حکومتی مذاکراتی کمیٹی کا اعلان کردیا جائے گا، جس کے بعد پی ٹی آئی اور حکومت کے درمیان مذاکرات کا باضابطہ آغاز ہوجائے گا۔
ذرائع کے مطابق پی ٹی آئی کو اس مذاکراتی کمیٹی کی تشکیل کی یقین دہانی مقتدرہ کی جانب سے کروائی گئی ہے۔
ذرائع کا کہنا ہے کہ وزیراعلیٰ خیبرپختونخوا علی امین گنڈاپور نے ڈیڑھ گھنٹے تک سابق وزیراعظم عمران خان سے اڈیالہ جیل میں ملاقات کی، وزیراعلیٰ علی امین گنڈاپور نے مذاکرات کے حوالے سے پیش رفت سے متعلق عمران خان کو آگاہ کیا۔
ذرائع کے مطابق وزیراعلیٰ علی امین گنڈاپور نے عمران خان کو آگاہ کیا کہ انہیں مذاکراتی کمیٹی تشکیل دینے سے متعلق یقین دہانی کروائی گئی ہے جو کہ رواں ہفتے ہی تشکیل دی جائے گی۔
ذرائع نے بتایا کہ عمران خان کو مشورہ دیا گیا ہے کہ مذاکرات کے باضابطہ آغاز تک سول نافرمانی کی تحریک کو مزید مؤخر کیا جائے۔
سابق وزیر خارجہ شاہ محمود قریشی نے بھی عمران خان کو سول نافرمانی کی تحریک وقتی طور پر مؤخر کرنے کا مشورہ دیا۔
ذرائع نے بتایا کہ سابق وزیراعظم عمران خان نے مقتدرہ کی مذاکرات سے متعلق سنجیدگی کو دیکھنے کے لیے سول نافرمانی کی تحریک کو مزید ایک ہفتے کے لیے مؤخر کرنے کا فیصلہ کرلیا ہے۔
یاد رہے کہ عمران خان نے 15 دسمبر کو سول نافرمانی کی تحریک شروع کرنے کا اعلان کیا تھا تاہم اپوزیشن اتحاد کے سربراہ محمود خان اچکزئی کی تجویز پر ایک ہفتے کے لیے اسے مؤخر کردیا گیا تھا۔
یہ بھی پڑھیں ہفتے تک مذاکرات پر مثبت پیشرفت متوقع ہے، علی امین گنڈاپور کی عمران خان سے ملاقات کے بعد گفتگو
سابق وزیراعظم عمران خان نے اتوار 22 دسمبر کو سول نافرمانی کی تحریک شروع کرنے کا باضابطہ اعلان کرنا تھا، تاہم وزیراعلیٰ علی امین اور شاہ محمود کی مشاورت کے بعد اسے مزید مؤخر کرنے کا فیصلہ کرلیا گیا ہے۔
