بنگلہ دیش میں انتظامی تبادلوں اور تقرریوں کے نظام میں بڑھتی ہوئی بے قاعدگیوں اور افراتفری پر حکومت کو شدید تنقید کا سامنا ہے، جہاں حالیہ مہینوں میں کئی اعلیٰ سطحی تقرریاں نوٹیفکیشن جاری ہونے کے فوراً بعد منسوخ کر دی گئیں۔
مقامی میڈیا رپورٹس کے مطابق گزشتہ 2 ماہ کے دوران کم از کم 15 اعلیٰ افسران کو اہم عہدوں پر تعینات یا منتقل کیا گیا، تاہم بعد ازاں ان تقرریوں کو یا تو منسوخ کر دیا گیا یا متعلقہ افسران کو مختلف تنازعات، عوامی تنقید یا ماضی سے جڑے الزامات کے باعث ہٹا دیا گیا۔
ان متاثرہ عہدوں میں سیکریٹریز، وائس چانسلرز، پولیس سپرنٹنڈنٹس اور مختلف سرکاری اداروں کے سربراہان شامل تھے۔
یہ بھی پڑھیں: محفوظ عالم کی فیس بک پوسٹ، بنگلہ دیش سیاست میں نئی بحث چھڑ گئی
ماہرین کے مطابق بار بار تقرریوں کی منسوخی سے حکومتی اسکریننگ اور ویٹنگ سسٹم کی کمزوریاں سامنے آ رہی ہیں، جس کے باعث سول انتظامیہ میں غیر یقینی صورتحال اور عدم استحکام پیدا ہو رہا ہے۔
بعض حلقوں نے یہ خدشہ بھی ظاہر کیا ہے کہ سوشل میڈیا مہمات اور آن لائن سرگرم گروہ سرکاری فیصلوں پر اثر انداز ہو رہے ہیں۔
ایک نمایاں کیس میں عبدالرشید میاں کو لوکل گورنمنٹ انجینئرنگ ڈیپارٹمنٹ کا چیف انجینئر مقرر کیا گیا تھا، تاہم کرپشن کے الزامات اور جاری تحقیقات کے باعث ان کی کنٹریکٹ پر مبنی تقرری صرف 5 دن بعد ہی منسوخ کر دی گئی۔
مزید پڑھیں: بنگلہ دیش کے اعلیٰ سول افسران کے وفد کا وزارت خارجہ کا دورہ، اسحاق ڈار کا خیرمقدم
اسی طرح وزارتِ زراعت نے امین الاسلام کو بنگلہ دیش رائس ریسرچ انسٹیٹیوٹ کا ڈائریکٹر جنرل مقرر کرنے کا فیصلہ صرف 2 دن بعد واپس لے لیا۔
ایک اور واقعے میں وزارتِ تعلیم نے ڈھاکہ یونیورسٹی کے پروفیسر ڈاکٹر ایم انیس الرحمن کو بیگم رقیہ یونیورسٹی کا وائس چانسلر مقرر کرنے کا اعلان کیا تھا، تاہم چند گھنٹوں بعد ہی یہ تقرری بھی واپس لے لی گئی۔
بنگلہ دیش پولیس میں بھی اچانک تبدیلیاں دیکھنے میں آئیں، جہاں حال ہی میں منتقل کیے گئے 3 پولیس سپرنٹنڈنٹس کو ان کے ماضی کے کردار پر تنقید کے بعد واپس بلا لیا گیا۔
مزید پڑھیں: انسانی ہمدردی کے تحت 170 بنگلہ دیشی شہریوں کو لیبیا سے وطن واپس منتقل کردیا گیا
تاہم ان فیصلوں کی کوئی باضابطہ وضاحت جاری نہیں کی گئی۔
رپورٹ کے مطابق اسی نوعیت کی انتظامی الجھنیں سابق عبوری حکومت کے دور میں بھی دیکھی گئی تھیں، جب سیکریٹریز اور ڈپٹی کمشنرز سمیت اہم عہدوں پر تقرریوں کے خلاف بیوروکریسی میں احتجاج سامنے آیا تھا۔
انتظامی ماہرین کا کہنا ہے کہ تقرریوں کی بار بار منسوخی حکومت کی ساکھ کو نقصان پہنچاتی ہے اور بیوروکریسی کے اندر گروہ بندی کو فروغ دیتی ہے۔
مزید پڑھیں: سلہٹ سرحد پر بھارتی فائرنگ پر بنگلہ دیشی بارڈر گارڈز کی جوابی کارروائی
ان کے مطابق تقرریوں سے قبل سخت اسکریننگ اور شفاف ویٹنگ نظام ناگزیر ہے۔
مزید یہ کہ کئی سینئر افسران مبینہ طور پر تبادلوں کے احکامات پر عمل درآمد میں تاخیر یا انکار کر رہے ہیں۔
26 اپریل کو مختلف اداروں میں تعینات کیے گئے 15 ایڈیشنل سیکریٹریز میں سے کم از کم 7 افسران ایک ماہ گزرنے کے باوجود اپنی نئی ذمہ داریوں پر رپورٹ نہیں کر سکے۔
مزید پڑھیں:
سابق کابینہ سیکریٹری محمد مشرف حسین بھوئیاں نے کہا کہ تبادلوں کے لیے افسران کی رضامندی لینا قانونی طور پر ضروری نہیں۔
اعلیٰ سطح کی تقرریوں کی حتمی منظوری وزیر اعظم کی جانب سے پبلک ایڈمنسٹریشن وزارت کی سفارشات کے بعد دی جاتی ہے۔
